IANAO

Tsy vera sy tavoahangy,

Tsy zava-mamy ihany,

Tsy hehy sy sangisangy

Hoe fady ny tomany

Ka iny ianao no leo

Rehefa ireo no tsy eo !

 

Io ianao mizara

Ny ratsy sy ny tsara,

Ny am-poko tsy miteny

Fa takatrao ireny,

Tsy vaky ny taraina

Fa azonao an-tsaina.

 

Inona ny havana ?

Teren'ny ra iraisana

Mbola mitantavana

Sy mampitondra faisana.

Voafehin'ny "satria"

Ka modimody tia.

 

Inona ny vady?

Ilay silaka fanahy,

Nafatotry ny voady

Ilay tanana mitahy,

Nanaovana sonia

Ho vonan’ny fitia.

 

Inona ny namana?

Mihoatra izany ianao.

Fa olo-manavanana

Akaiky tsotra izao.

Mahay mandray tokoa

Ny resaky ny fo.

 

Ka inona àry ianao?

Tsy misy ianao ireo,

Tsy misy iantsoako anao,

Tsy aloka, tsy feo

Fa isan’ireo vitsy

Hoe tena izaho mihitsy!