Ok

By continuing your visit to this site, you accept the use of cookies. These ensure the smooth running of our services. Learn more.

  • ISAN'ANDRO ITY, ISAN'ANDRO TIA

    Ho avy izao ilay andro iray ankalazana ny fitia

    Miandry andro iray tokoa mba hamitahana ny fo

    Mandrindra teny vaovao

    Mizara angola tsy fanao

    Mamelon-tsoratra tsy satry

    Izay hadino tao anaty.

     

    Nahoana moa ‘ty andro iray

    No tsy fantatra hatrizay ?

    Tsy azo atao ve ny minia

    Mba ho isan’andro, tia ?

     

    Tia fa vizan-davareny,

    Na tia fa tsy an-kiteniteny

    Dia manjary misy hoe miandry baiko faobe

    Mandray aloha vao manome

     

    Misy ireo mifankatia tsy mankalaza ny fitia

    Mahafoy ny tsara indrindra ho an’ny tiany eo no ho eo

     

    Misy ireo mifankatia, na velirano tsy natao

    Tsy manao ho litania miantsoantso « tiako ianao »

    Fa isan’andro, tia tokoa

    Mizara izay haren’ny fo

     

    Izy ireny dia manovo amin-doharano iray,

    Loharanon’ny fitia, tsy mety ritra sanatria

    Tsy mila teny be dia be,

    Tsy miandry setriny ihany koa

    Tsy misy kajy be atao hikatsahana ny soa

    Izy ireny dia mizara isan’andro raha ilaina

    Ilay fitiavana tsy lany efa zary fofonaina.

     

    Izy ireny ilay mitia tena misy hoe satria.

     

    Raha misy antony an’arivo hahafoana ny satria

    Dia mbola hisy anankiray hijanonany ho tia !

     

    images(51).jpeg

    (Voarindra ho hira, ankasitrahana nanome aina i #Fara_RASOLONJANAHARY)