SORATSORATRA

Izay mameno ny fo nefa tsy voalazan'ny vava dia ambaran'ny soratra.

 

Tsy voatery ho nataon'ny tanan'ny tena na nokaomandian'ny tena fa amidy eny an-tsena. Misy fihetseham-po amidy eny an-tsena ry havako! Misy mifanandrify sy mifanitsy amin'izay tora-po rehetra. Misy ahazoana aingam-panahy vaovao ihany koa. Samy manana ny fitoerany izy ireny :

 

-lovia bakoly kely
-autocollant
-tableau ahantona amin'ny rindrina
-sary hosodoko
-page facebook sns
-pare-boue amin'ny fiara be
-pare-brise
-vody posy
-vatana sarety

Etsetra etsetra.

 

Ny votoatiny dia ao ny fankaherezan-tena, ao ny fantsy alefa aminao mamaky, ao ny fintana atao jono, ao ny lonilony tsy levona, ao ny nofinofy tiana ho tanteraka, ao ny hafatra madinidinika asisika an-tsokosoko any an-tsainao (message subliminal), ao ny fampihomehezana mba tiana hatao, ao ny sombintsombin-dahatsoratra tamin'ny boky, sy ny maro tsy ho voatanisa ...

 

-Herim-po fa tsy lova
-Mba manaova raha mahay
-Ity tanana e
-Mody tsy tia nefa manara-maso
-Ianao aza tsy manana
-Iny lalana iny
-Arovy aho Tompo
-Sambatra izay mifanampy
-Halan'ôlo fa tian-janahary
-Ny mpanenjika any aoriana
-...

 

Ity no hitako vao haingana : "Mandrosoa ry mpialona fa ny tompon-trano tsy sarotiny".

 

Izay e.
Soava dia. Tsy minday pasazy!