TALOHA

Mpanabe. Iza no beazina sa inona no halehibeazina.

 

Ity izaho ity, dia vokatry ny asan’olona sy antokon’olona maro : i dada sy i neny, ny fianakaviana, ny sekoly, ny fiangonana, ny fikambanana vitsivitsy, ny mpiara-monina, ny boky aman-gazety, ny radio.

 

Ny tsara sy ny ratsy rehetra mandrafitra ahy dia misy sonian’izany rehetra izany.

 

Taloha.

-amin’ny 7 ora no miditra ny sekoly alahady. Amin’ny 9 ora sy sasany vao miditra ny fiangonana. Aterina eo an-tokotanim-piangonana izahay dia lasa ny lehibe. Tsy misy ahiahy.

 

-nampidirina tamin’ny fikambanana atao hoe skoto izahay, nalefa « irery » nilasy lavitra ny toeram-ponenana, andro maromaro. Tsy nisy tohina. Mbola tovovavy aho, mpiandraikitra skoto, dia nisy ray aman-dreny maromaro nanankina ny zanany tamiko. Tsy nisy nipika.

 

-mbola zaza izahay dia naterina tany amin’ny havanay tany ambanivohitra be, miaraka amin’ny ankizy hafa maromaro, handany ny fotoam-pialan-tsasatra lehibe. Tsy narary, tsy narikoditra, tsy nisy nahabangana ny entan-kely nampitondrain’i neny, mbola nisy niverina ny vatsy kely nentina. Naratra ihany nazeran’ny bisikileta sy nianjera avy eny ambony paiso, fa tsy dobo an-drano, tsy nisy nanolana. Nifampatoky ny mpihavana.

 

-tany an-tsekoly. Rehefa tsy dia salama izahay, dia omena ny mpampianatra ny fanafody sy ny carnet, dia izy no mampisotro « sirop » rehefa amin’ny lerany. Rehefa tsy ho afaka hitsena anay ry dada amin’ny antoandro, dia miantso an-telefaona any an-tsekoly, mangataka mba hanao demi-pension. Tsy nisy gidragidra. Indray andro aza moa, natory tany izahay satria tena tsy afaka naka anay ny ray aman-dreny noho ny asa aman-draharaha …

Novembre 2017. Tsy mbola nisy efapolo taona izany « taloha » resahako izany. Mahatsiarotsiaro indray Rafotsy …